ربط طابعة فواتير حرارية بموقعك — 58 و80 مم تطبع صح من المتصفح

الوصف

الفاتورة بتطلع ورقة بيضا؟ أو مقصوصة من الجنب؟ أو الأبعاد غلط والورق بيتهدر؟

الوجع ده ليه أسباب متداخلة، ومعظمها مش باين في أدوات المطورين. أنا عدّيت منه في نظام نقاط بيع شغّال في محلات حقيقية — والعميل رنّ عليّا مرتين على «الفاتورة بيضا»، وكان فيه سببين مختلفين تحت بعض:

١. قاعدة الطباعة كانت بتخبّي الصفحة كلها وماترجّعش تظهر الفاتورة.
٢. وحتى بعد ما اتصلح ده، الورقة فضلت بيضا — لأن منطقة الطباعة بتتشال من التخطيط فارتفاعها بيبقى صفر، والورق الحراري بيحسب ارتفاع الصفحة من المحتوى. محتوى ارتفاعه صفر = ورقة فاضية.

اللي هعمله:
• أظبط الفاتورة تطبع صح على مقاسك (58 مم أو 80 مم) من المتصفح مباشرة
• أضبط الهوامش والقص وحجم الخط عشان مايتهدرش ورق
• أظبط الاتجاه والعربي في الفاتورة (RTL)
• أخلّي أي شاشة تانية في البرنامج تطبع بنفس الطريقة من غير ما تعيد الشغل
• أسلّمك الكود مشروح، وتقدر تجربه قبل ما تستلم

بشتغل على الويب (HTML/CSS للطباعة) — يعني من غير برامج وسيطة ولا drivers خاصة.